Високата претставничка на ЕУ за надворешна и безбедносна политика, Каја Калас, изјави дека притисокот за постигнување мир мора да биде насочен кон Русија, а не кон Украина, како жртва на агресијата. Таа предупреди дека примената на спротивен пристап би можела да доведе до нов конфликт во иднина.
„Се плашам дека целиот притисок се врши врз послабата страна, бидејќи предавањето на Украина е најлесниот начин да се заврши оваа војна. Но, ако сакаме оваа војна да заврши и да не избувне повторно за неколку години, тогаш мора да го извршиме целиот притисок врз агресорот, односно Русија“, изјави Калас по состанокот на министрите за одбрана на земјите-членки на ЕУ.
Нејзините коментари доаѓаат во пресрет на утрешниот состанок меѓу рускиот претседател Владимир Путин и американскиот претставник Стив Виткоф. Калас се осврна и на дебатата за користењето на замрзнатите руски средства за финансирање репарациски заем за Украина, иницијатива на која најмногу се спротивставува Белгија, земја во која е депониран најголемиот дел од средствата.
Таа оцени дека загриженоста на Белгија е разбирлива, но посочи дека Европската Унија е подготвена да го сподели секој потенцијален ризик.
„Напротив, употребата на замрзнати руски средства би ја зајакнала и позицијата на ЕУ“, рече Калас, отфрлајќи го тврдењето на белгискиот премиер Барт де Вевер дека ваквиот чекор би го загрозил мировниот процес. Според неа, користење на средствата би ја зајакнало позицијата и на Украина и на Европската Унија во идните преговори.