Потпишувањето на 60 поединечни колективни договори со институциите од јавниот сектор претставува историски момент кој досега не се случил од осамостојувањето на државата, смета професорот по трудово право Лазар Јовевски. Тој во гостување на ТВ „Њузмакс“ истакна дека со овој процес се создава лепеза на подобрени права, чија круна е најавеното покачување на платите од 42 до 43 проценти во период од две години.
Според пресметките на професорот, покачувањето е системско и врзано со основицата и растот на минималната плата. „Оваа година веќе имаме речиси 14 проценти зголемување на основната плата. Тоа не се само седум проценти, туку двојно повеќе ако се земе предвид и растот на минималната плата“, појаснува Јовевски. Тој додава дека овој тренд ќе продолжи и во 2027 и 2028 година, со што Македонија се позиционира како лидер во колективното преговарање во регионот.
Јовевски нагласува дека специфичноста на овие договори е нивната децентрализација – секоја институција потпишува посебен договор прилагоден на потребите на вработените. Покрај платите, со договорите се регулираат и прашањата за годишни одмори, безбедност при работа и флексибилно работно време, што според него е вистински вин-вин пристап.