Овогодинешната државна матура е спроведена во најдобар ред, со значително намален број на случаи на препишување, изјави денеска министерката за образование и наука, Весна Јаневска. Одговарајќи на новинарски прашања, таа оцени дека организацијата била на високо ниво и дека повеќето од матурантите испитите ги полагале совесно.
Министерката потенцираше дека новиот начин на организација и полагањето во поголеми простории дале позитивни резултати во спречувањето на манипулациите за време на тестирањето.
„Можеме да се пофалиме дека оваа година државната матура помина во најдобар ред и мир, организирана така како што треба, во најголем дел во големи простори, каде што учениците немаа можност да прибегнат кон нелегални дејства“, рече Јаневска.
Таа додаде дека бројот на матуранти кои биле санкционирани и отстранети од училниците е многу помал во споредба со претходните години, што според неа е показател за сериозен напредок во процесот.
„Од двата испитни термина отстранети се шеесетина ученици, што покажува дека има одличен напредок во спроведувањето на матурата“, нагласи министерката.
Сите ученици кои биле фатени во обид да препишуваат веднаш биле исклучени од процесот. Како што информираше Јаневска, овие ученици ја изгубиле можноста за оцена во овој рок, но ќе можат повторно да ги полагаат испитите во следниот термин, односно во август.
Министерката за образование и наука дополнително појасни дека годинава е имплементиран нов пристап во тестирањето, кој овозможил два типа на матура прилагодени на наставните планови и програми. Според нејзината оценка, со оваа промена е отстранета досегашната нерамноправност која постоела меѓу учениците во средното образование.