Учениците од прво до трето одделение од оваа година ќе добијат дигитални свидетелства, додека од следната година овој процес ќе се прошири и за учениците од четврто до шесто одделение, најави министерката за образование и наука, Весна Јаневска.
Министерството веќе ги обезбеди потребните електронски печати и потписи, но со цел да се избегнат технички проблеми во помалите или руралните средини, годинава ќе се применува комбиниран модел.
„За овие три одделенија воведовме систем што може да се нарече хибриден. Од следната година свидетелствата ќе бидат целосно дигитални. Дигитализацијата е од исклучително значење за државата и затоа се спроведува во МОН во најголема можна мера“, изјави Јаневска.
Министерката појасни дека хибридниот модел се применува бидејќи сè уште не се сите наставници подеднакво подготвени за комплетна дигитална средина, иако поминале низ интензивни обуки.
Јаневска воедно им го честиташе успешниот крај на учебната година на сите ученици и наставници, потенцирајќи дека според сите релевантни показатели, оваа учебна година покажала многу подобри резултати од претходната.