Најстариот универзитет во државата, „Св. Кирил и Методиј“ – Скопје (УКИМ), на 28 април ќе спроведе избори за нов ректор кој ќе го води Универзитетот во мандатниот период од 16 септември 2026 до 15 септември 2029 година. Гласањето ќе биде тајно и ќе се одвива на сите единици во состав на УКИМ, во периодот од 12 до 14 часот.
Во трката за престижната позиција официјално влегуваат двајца кандидати кои веќе поднеле комплетна документација: актуелната ректорка, проф. д-р Биљана Ангелова од Економскиот институт и проф. д-р Дарко Данев, редовен професор на Машинскиот факултет.
Професорот Данев, кој два мандата беше декан на Машинскиот факултет (2016-2023), во својата кандидатура промовира визија за модерен и меѓународно конкурентен универзитет. Неговиот фокус е ставен на дигитализацијата, поврзувањето со индустријата и поголема поддршка за студентите и младите истражувачи.
Од Универзитетската изборна комисија (УИК) информираат дека процесот се одвива строго според предвидениот роковник. Утре истекува рокот за поднесување приговори за листата на кандидати, а доколку нема пречки, на 21 април јавно ќе бидат објавени програмите за работа и биографиите на кандидатите.
Првичните резултати од тајното гласање треба да бидат познати на самиот ден на изборите (28 април), додека конечните резултати, по завршувањето на евентуалните жалбени постапки и прегласувања, ќе бидат официјално објавени на 14 мај.