Една година по трагедијата во дискотеката Пулс во Кочани, каде животот го загубија 63. лица, на социјалната мрежа Фејсбук се огласи Иван Стојменов, еден од повредените во страотниот пожар кој засекогаш ја зави Македонија во црно.
-Помина една година од нокта што засекогаш ми го промени животот.
Нокта кога во дискотеката „Пулс” избувна пожар и се за неколку секунди се претвори во хаос, чад и страв. Нокта кога животот и смртта беа толку блиску.
Со изгореници по рацете, лицето и дишните патишта, завшив во болница во Словенија. 10 дена кома и скоро 1 месец борба… борба за здив, за сила, за живот. Докторите вела дека е критично
Но Господ имаше други планови.
Денес сум тука. Со лузни што засекогаш ке ме потсетуваат на таа нок. Лузни што не се само на кожата, туку и во душата.
Таа нок никогаш нема да се заборави. Никогаш нема да ги заборавиме лугето што не успеаа да излезат. Нивните животи и нивните приказни засекогаш ке останат во нашите срца.
Оваа година ме научи нешто што многумина го забораваат – животот е кревок. Секој ден е подарок. Секој здив е благослов.
Денес сум благодарен на бога што сум жив. Благодарен на докторите, на моето семејство и на сите луге што беа покраі мене кога беше најтешко.
Животот ми даде втора шанса.
И ветувам дека ке ja живеам така како што заслужува.
Никогаш да не се повтори.!!!!! Вечна им слава на починатите, напиша Иван во постот.
На 16 март 2025 година, во трагичниот пожар што избувна во дискотеката „Пулс“, животот го загубија 63 лица, меѓу кои имаше и деца, додека повеќе од 200 луѓе беа повредени. Непосредно по несреќата беше одржана итна седница на Советот на Општина Кочани, по што беше прогласена седумдневна жалост – најпрво на локално, а потоа и на државно ниво. Иако првичните информации говореа за 59 загинати и над 150 повредени, по завршувањето на лекувањето на повредените и во рамки на обвинителните постапки, конечниот биланс изнесуваше 63 жртви и повеќе од 200 повредени.
Истрагата покажа дека ноќниот клуб со години функционирал незаконски, без исполнување на основните технички и безбедносни услови, без соодветни дозволи и без почитување на противпожарните стандарди. Во објектот биле вршени реконструкции без стручен надзор, биле употребувани лесно запаливи материјали, а просторот не ги задоволувал ниту основните безбедносни критериуми.
Кобната вечер биле активирани три пиротехнички средства во исто време, насочени кон плафонот обложен со полиуретански сунѓер. Пожарот се проширил за само неколку секунди, а густ чад и паника ги затекнале посетителите во клубот кој имал само еден, недоволно соодветен излез. Поголемиот дел од жртвите загинале обидувајќи се да стигнат до вратата, која не претставувала стандардно евакуациско решение.
Точно во 02:32 часот, со едноминутен молк им беше оддадена почит на жртвите кои трагично ги загубија животите во пожарот во дискотеката „Пулс“, настан што засекогаш го промени Кочани.
„Да застанеме заедно во тишина за нашите 63 ангели. Во 02:32 часот, моментот што засекогаш го обележа Кочани, ќе оддадеме почит со минута молк. Нека светлината биде потсетник дека не забораваме, а тишината нека зборува за љубовта што останува“, порачаа од здружението на граѓани „16 Март 2025“, организатори на собирот пред дискотеката.
Жртвите се Диме Димитријев, Сара Алексова, Моника Спасова, Тоше Тодоровски, Александар Коларов, Адријан Живков, Александар Алексов, Горги Величков, Јорданчо Џамов, Иван Трајчев, Џоко Горгиев, Александар Глигоровски, Иван Величков, Андреј Стојанов, Ивона Антова, Павел Христовски, Никола Насевски, Тоше Богданов, Ана Коцева, Гордан Петрушов, Игорче Горгиев, Филип Стевановски, Томче Стојанов, Моника Стоименова, Стојанчо Стојанов, Сара Пројковска Николовска, Марија Шопова, Александар Горгиев, Петар Ивановски, Бојана Закова, Матеј Марковски, Горѓи Василков, Александар Петров, Андреја Горѓиевски, Марија Стрезоска, Александар Ефремов, Лепа Тасева Стојковска, Игор Велков, Божидар Минов, Мартин Атанасовски, Стефанија Соколова, Томас Златков, Кети Милковска, Виктор Јорданов, Андреј Панов, Спиро Стоименов, Јове Владимитов, Стефан Тасевски, Ице Андонов, Александар Стојанов, Сања Христова, Дамјан Танески, Андреј Лазаров, Драгана Минова, Филип Ивановски, Сара Јорданова, Леонид Велков, Надица Наунова, Димитар Иванов и Владимир Блажев. Слава им.