Италијанскиот парламент усвои нов закон со кој дел од затворениците кои имаат проблеми со зависност од дрога или алкохол ќе можат затворската казна да ја издржуваат во домашни услови.
Мерката се носи со цел да се намали долгогодишниот проблем со пренатрупаноста во казнено-поправните установи низ земјата.
Според податоците на здружението за заштита на правата на затворениците „Антигона“, италијанските затвори во моментов се исполнети со околу 140 проценти од нивниот реален капацитет. Со ова, Италија се наоѓа во самиот врв меѓу земјите со најпренатрупани затвори во Европската Унија.
Министерот за правда Карло Нордио изјави дека новата мерка би можела да опфати повеќе од 10.000 затвореници кои имаат проблем со зависност од дрога, од вкупно околу 65.000 лица што моментално издржуваат затворски казни. Тој додаде дека дополнително уште околу 3.700 затвореници со зависност од алкохол би можеле да ги исполнат условите за издржување на казната надвор од затвор.
И премиерката Џорџа Мелони оцени дека законот ќе придонесе за намалување на притисокот врз затворскиот систем, но и ќе им помогне на зависниците полесно да се рехабилитираат и да се оддалечат од криминалот.
Од друга страна, од здружението „Антигона“ изразија сомнеж за ефикасноста на ова решение. Оттаму посочуваат дека можноста за домашен притвор зависи од низа услови, а предвидените буџетски средства се доволни за финансирање на помалку од 600 места во соодветните центри за рехабилитација.
Властите очекуваат новите правила да дадат резултат, иако крајниот ефект ќе зависи од практичната примена и реалниот број затвореници кои ќе ги испуштат пропишаните критериуми.