Основното јавно обвинителство за гонење на организиран криминал и корупција отвори постапка против виш јавен обвинител од Вишото јавно обвинителство Битола, под сомнение дека примал награда за противзаконито влијание.
Од Обвинителството соопштуваат дека со примена на повеќе истражни дејствија и посебни истражни мерки биле обезбедени докази кои упатуваат на сомнение дека обвинителот ја користел својата службена положба и влијание за да влијае врз одлуките на други јавни обвинители и судии.
Според досегашните сознанија, тој наводно интервенирал во најмалку четири предмети, со цел за осомничени или обвинети лица да се обезбедат поблаги казни или поповолна процесна положба.
Вчера, по судска наредба, биле извршени претреси во домот на осомничениот и во просториите на ВЈО Битола, при што биле обезбедени материјали и докази за понатамошната постапка.
Истрагата продолжува, а надлежниот обвинител до судијата на претходна постапка доставил предлог за определување мерки на претпазливост. Се бара одземање на патната исправа и забрана за извршување одредени работни активности, односно привремено отстранување на осомничениот од работното место.