Собранието беше домаќин на официјалната посета на претседателката на Република Индија, Друпади Мурму.
Ова е прва посета на еден претседател на Индија на Северна Македонија, што претставува значаен момент во зајакнувањето на односите меѓу двете земји.
Во рамките на посетата, претседателката Мурму беше пречекана од претседателот на Собранието, Африм Гаши, со кого одржа тет-а-тет средба.
По средбата, таа се потпиша во Книгата на впечатоци, изразувајќи благодарност за гостопримството и истакнувајќи ги историските и културните врски меѓу двата народа.
Мурму им се обрати на пратениците на пленарна седница, нагласувајќи дека демократијата е вредност што ги обединува двете држави.
За позицијата на земјава во глобалната политика, индиската претседателка истакна:
„Ние не ја сметаме Северна Македонија за далечна земја, туку за важен столб во градењето одржлива, мултиполарна и просперитетна глобална иднина.“
Говорејќи за историските врски, таа ја истакна личноста на Мајка Тереза, нарекувајќи ја „најпознатата ќерка на Скопје“, која Индија ја нарекуваше свој дом.
За време на престојот таа ќе ѝ оддаде почит на Мајка Тереза, а најави и дека на македонскиот народ ќе му подари биста на Махатма Ганди.
Високата гостинка ја потенцираше важноста на парламентарната дипломатија и зголемувањето на учеството на жените во демократскиот живот.
Седницата ја затвори со порака заснована на древната индиска филозофија „Целиот свет е едно семејство“, повикувајќи на градење мостови на соработка во време на глобални предизвици.