Иранскиот претседател Масуд Пезешкијан денеска ги отфрли гласините за можно средба со американскиот претседател Доналд Трамп, во изјава дадена кратко пред неговото поаѓање за Генералното собрание на ОН во Њујорк.
Пезешкијан рече дека е за дијалог и разбирање во меѓународните односи, јави иранската државна новинска агенција IRNA.
– Но, не можете да преговарате со некој кој сака да демонстрира моќ, да тиранизира, уништува и предизвикува штета, додаде тој, без директно да го именува Трамп.
Односите меѓу Иран, САД и Европа се на најниско ниво во последните години по 12-дневната војна во јуни, кога Израел, заедно со САД, нападна клучни нуклеарни објекти во Исламската Република.
Пред војната, Техеран и Вашингтон преговараа повеќе од два месеци околу иранската нуклеарна програма, но разговорите заглавија.
Нуклеарниот спор се засили дипломатски по војната, кога иранската влада привремено ја прекина соработката со Меѓународната агенција за атомска енергија (МААЕ).
Иранскиот министер за надворешни работи Абас Арагчи вчера во Њујорк се сретна со директорот на МААЕ Рафаел Гроси. Пред две недели, двајцата дипломати се договорија во Каиро за план за обновување на нуклеарните инспекции.