Корпусот на Исламската револуционерна гарда (ИРГЦ) утрово соопшти дека го започнал 80-тиот бран од операцијата „Вистинско ветување 4“. Цел на нападите се стратешки точки и воени центри на северот на Израел, американски воени бази во регионот, како и цели во Кувајт, Бахреин и Јордан.
Според соопштението, последната фаза од операцијата е спроведена од воздухопловните сили на ИРГЦ, како директна поддршка на офанзивите на либанското движење Хезболах. Како што објави порталот „Прес ТВ“, нападите се насочени кон израелски воени цели и позиции на југот на Либан.
Меѓу погодените локации се наведуваат Тел Авив, Кирјат Шмона и Бнеи Брак. Истовремено, ракетирани се и американските воени бази „Али ал-Салем“ и „Арифџан“ во Кувајт, „Ал-Азрак“ во Јордан и „Шеик Иса“ во Бахреин.
Од ИРГЦ тврдат дека стратешките точки на северот биле под тешки и континуирани ракетни напади. Една од главните цели била воената команда на израелската армија во градот Сафед, задолжена за координација на операциите долж северните граници.
„Нападите претставуваат почеток на серија однапред најавени операции против ционистичкиот режим“, се наведува во официјалното соопштение.
Иранските сили предупредија дека воените собири на северот и во Појасот Газа ќе бидат изложени на интензивни напади со ракети и беспилотни летала. ИРГЦ порача дека „корпусот нема да попушти во спроведувањето контранапади“.
Операцијата „Вистинско ветување 4“ е активна од 28 февруари, како одговор на новите напади од САД и Израел врз Иран. Од ИРГЦ велат дека операциите ќе продолжат до „целосна победа“.