Иран е подготвен да ја отвори Ормуската Теснина доколку САД ја прекинат блокадата на иранските пристаништа и војната против Исламската Република, соопштија регионални претставници. Техеран истовремено предлага прашањата околу неговата нуклеарна програма да бидат предмет на дискусија во подоцнежна фаза од преговорите.
Понудата пристигнува во време на зголемени тензии по почетокот на израелско-американската воена операција на 28 февруари. Како што пренесува „Аксиос“, иницијативата е пренесена до Вашингтон преку Пакистан, откако иранскиот министер за надворешни работи, Абас Арагчи, ја посети Русија, клучниот сојузник на Техеран.
Иако американскиот претседател Доналд Трамп претходно потврди дека Иран испратил „многу подобра“ понуда, официјален Вашингтон останува скептичен кон прифаќањето на овие услови. Трамп нагласи дека еден од основните услови на САД останува дециден: Иран „да нема нуклеарно оружје“.
Конфликтот околу Ормуската Теснина, низ која во мирно време транзитира една петтина од светските залихи на нафта и природен гас, директно влијае на глобалните пазари. Блокадата на иранските пристаништа го лиши Техеран од нафтени приходи, но создаде и сериозен проблем со складирањето на нафтата поради прекин на производството.
Ситуацијата предизвика значителен притисок врз администрацијата на Трамп, поради наглиот пораст на цените на енергенсите во пресрет на ноемвриските среднорочни избори во САД. Истовремено, блокадата ги стави во незавидна положба американските сојузници во Персискиот Залив, кои целосно зависат од овој стратешки премин за извоз на своите енергетски ресурси.