Во вторник и среда, 18 и 19 август 2026 година, започнува првиот уписен рок за студенти на Универзитетот „Св. Кирил и Методиј“ во Скопје. За академската 2026/2027 година, која започнува на 1 октомври, на 23 факултети се предвидени вкупно 8.851 слободно место.
Од нив, 4.395 места се наменети за редовни студенти во државна квота, 3.621 за редовни студенти кои кофинансираат, а 835 места се за вонредни студенти.
Најмногу места има на Медицинскиот факултет – 950, Филолошкиот – 805, ФИНКИ – 800, Филозофскиот – 635, Природно-математичкиот – 626, Економскиот – 655, ФЕИТ и Машинскиот факултет по 600, додека на Правниот факултет се предвидени 555 места.
За студентите во државната квота надоместокот за студирање изнесува 200 евра во денарска противвредност, додека студентите кои кофинансираат и вонредните студенти плаќаат школарина од 400 евра.
Првиот уписен рок е на 18 и 19 август, конечната ранг-листа ќе биде објавена на 27 август, а запишувањето на примените кандидати ќе се спроведе на 3 и 4 септември.
Вториот рок е предвиден за 10 и 11 септември, а третиот на 23 септември, на факултетите каде што ќе останат слободни места.
Пред пријавувањето, кандидатите треба да се регистрираат преку платформата за уписи на УКИМ и да ја пополнат електронската пријава во системот iKnow. Пријавувањето потоа се врши во службата за студентски прашања на факултетот за кој кандидатот се определил.
Условите за упис, потребната документација, критериумите за селекција и начинот на пресметување на бодовите се детално наведени во конкурсот на УКИМ. Во него се објавени и листите на екстерни и интерни предмети од државната матура кои се соодветни за запишување на различните студиски програми.