Невообичаен улов во морските води кај Крит го привлече вниманието на експертите, откако локален рибар улови примерок од една од најопасните инвазивни риби во Средоземното Море.
Станува збор за рибата напухач (Lagocephalus sceleratus), позната и како сребренообразна риба жаба. Овој вид содржи исклучително силен отров и претставува сериозна опасност по здравјето и животот на луѓето доколку се консумира.
Рибарот Никос Куракис го уловил примерокот со должина од околу 50 сантиметри во близина на Ираклион, а снимките од уловот брзо се проширија на социјалните мрежи.
Научниците предупредуваат дека најголемиот проблем не е нејзината големина, туку високата токсичност и брзото ширење низ морскиот екосистем. Овој вид потекнува од Црвеното Море, а во Средоземното Море пристигнал преку Суецкиот Канал, со сè почеста зачестеност околу Крит, Додеканезите и Егејското Море.
Биолозите објаснуваат дека рибата нема природни непријатели во Медитеранот, поради што брзо се размножува. Нејзиното тело содржи тетродотоксин — моќен невротоксин кој е најконцентриран во црниот дроб, јајниците и кожата, а чие консумирање може да предизвика парализа и смрт. Заради тоа, продажбата и консумирањето на оваа риба се строго забранети во Грција и во целата Европска Унија.
Покрај опасноста по здравјето, овој вид нанесува штета и на рибарите бидејќи со силните вилици ги кине мрежите и ги уништува економски важните видови риба. Морските биолози предупредуваат дека затоплувањето на морињата дополнително го поттикнува нејзиното ширење.