Во турскиот град Дијарбекир, тримесечно бебе го загуби животот откако неговата мајка го фрлила низ прозорец од четвртиот кат на станбена зграда. Мајката е приведена, а надлежните органи спроведуваат истрага за случајот, пренесува турскиот весник „Хуриет“.
Инцидентот се случил во утринските часови во станбена зграда на улицата 477, во населбата Фират, во округот Кајапинар. Според првичните информации, Н.Е., која се породила пред три месеци, наводно доживеала нервен слом од засега непознати причини.
Се наведува дека таа страдала од психолошки проблеми и дека инцидентот се случил во станот на нејзиниот свекор, каде што била на гости. По пријавата, на местото на настанот пристигнале екипи на итната медицинска помош и полицијата.
Медицинските служби ја констатирале смртта на бебето на лице место, по што телото било пренесено во мртовечница за обдукција.
Надлежните институции започнаа сеопфатна истрага за утврдување на сите околности поврзани со трагичниот настан.