Италијанскиот град Перуџа, поточно областа Сан Систо, стана сцена на брутална пресметка меѓу две групи иселеници од Македонија и Албанија. Она што започнало како банална расправија во локален бар, завршило со тешки повреди и масовни апсења.
Истрагата открива дека до крвавиот инцидент не дошло поради претходно планирана заседа, туку поради банална причина – фотографија направена со мобилен телефон. Вербалниот конфликт во барот ескалирал за неколку минути, по што групите излегле на улица вооружени со маси, столици и дрвени палки долги над 60 сантиметри. Во тепачката учествувале и неколку романски државјани.
Инцидентот добил уште подраматичен пресврт кога двајца од учесниците, во обид да побегнат со автомобил, со голема брзина удриле 27-годишен македонски државјанин.
Младиот Македонец е хоспитализиран со тешки фрактури на двете нозе (лекување од мин. 30 дена).
Полицијата сè уште трага по возачот и сопатникот, од кои едниот е малолетник.
Голем број карабиниери и полицајци интервенирале по пријава на бројот 112. Епилогот од акцијата е:
- 11 уапсени лица (возраст од 19 до 31 година).
- Пронајдена дрога кај еден од приведените.
- Обид за прикривање докази (сокривање клучеви од возило во саксија).
Сите приведени се префрлени во затворот „Капане“ во Перуџа и ќе се соочат со обвиненија за тешко насилство.