Според информациите за МИА од СВР Охрид, преку портпаролот Стефан Димоски, во саботата преку преминот поминале 15.290 патници, од кои 10.229 странски и 5.061 македонски државјани. На влез биле регистрирани 5.339 странци и 2.041 македонски државјани, додека на излез 4.890 странци и 3.020 македонски државјани.
Во неделата, како што се наведува, биле евидентирани 10.847 патници – 7.148 странски и 3.699 македонски државјани. На влез тогаш биле регистрирани 3.726 странци и 1.625 македонски државјани, а на излез 3.422 странци и 2.074 македонски државјани.
Од СВР Охрид појаснуваат дека најголем дел од странските патници се албански државјани од пограничниот регион, кои редовно доаѓаат во Дебар за набавка на гориво и други потреби, особено во сабота кога е пазарен ден, како и за посета на туристички дестинации во регионот.
Македонските државјани, пак, најчесто патуваат кон албанското крајбрежје, особено кон Шенѓин и Драч.
На преминот од македонска страна функционираат четири шалтери, што овозможува побрз проток на патници, додека на албанска страна, според албанските медиуми, се активни два, што повремено создава застои и колони возила.
Инаку, двете влади веќе го одобрија воведувањето на системот „One Stop Shop“, кој по преминот „Ќафасан“ кај Струга треба да се имплементира и на граничниот премин „Блато“.