На одбележувањето на 80-годишнината од основање на ООН, генералниот секретар, Антонио Гутереш, предупреди дека основните принципи на ОН се соочуваат со невидени закани.
„Во овој момент, принципите на Обединетите нации се нападнати како никогаш досега“, рече Гутереш во своето обраќање пред Генералното собрание по повод годишнината.
Генералниот секретар на ОН ги спомена актуелните кризи во кои „цивилите се цел на напади, а меѓународното право се гази во Газа, Украина, Судан и пошироко“, додека сиромаштијата и гладот растат глобално. Гутереш, исто така, ги истакна предизвиците на климатските промени:
„Планетата гори, со пожари, поплави и рекордни топлотни бранови што беснеат низ климатскиот хаос“.
Гутереш потсети на историските достигнувања на ООН, вклучувајќи ги искоренувањето на сипаниците, обновувањето на озонската обвивка и спречувањето на Третата светска војна. Тој предупреди дека светот влегува во ера на мултиполарност без силни мултилатерални институции, создавајќи ризици слични на оние со кои се соочи Европа во пресрет на Првата светска војна.
„За да одговориме на овие предизвици, мораме не само да ги браниме Обединетите нации, туку и да ги зајакнеме“, нагласи тој.
Аналена Бербок, претседателка на Генералното собрание на ООН, потсети на потпишувањето на Повелбата на ООН на 26 јуни 1945 година, опишувајќи ја како „ветување дека нема да нè води во рајот, но никогаш повеќе нема да нè влече во пеколот од силите на омразата и нескротливата амбиција“.
Бербок призна дека темнината владее денес, наведувајќи ги „децата без родители кои молат за храна во урнатините на Газа, војната во Украина, сексуалното насилство во Судан“ и други глобални кризи.
„Не можеме да го избереме полесниот пат и едноставно да се откажеме“, рече таа, повикувајќи на храброст да се соочиме со проблемите „заедно, на подобар начин“.
Неделата на Генералното собрание на ОН, на која присуствуваат шефовите на држави и влади, продолжува до 29 септември.