Грковска – Кирс: Податоците кои се однесуваат на трошењето на јавните средства мора да бидат јавни

Заменичката на претседателот на Владата задолжена за политики за добро владеење Славица Грковска, во рамките на дигиталната конференција „E-governance“ што се одржува во Талин, Естонија, се сретна со надворешниот соработник на естонскиот Инспекторат за заштита на податоци Марја Кирс, со која разговараа за значењето на транспарентноста во општеството и потребата за објавување на сите податоци, особено на оние што се поврзани со трошењето на јавните средства.

Вицепремиерката Грковска оцени дека Република Северна Македонија има постигнато значаен напредок во делот на транспарентноста и нагласи дека Владата и нејзиниот Kабинет преземаат дополнителни мерки кои ќе обезбeдат значително зголемување на транспарентноста.

Сите државни институции во Естонија, информираше Кирс, имаат обврска на своите страници да ги објавуваат сите податоци, освен оние за кои има рестрикција. Секако, нагласи таа, не може да се забрани пристап до документ кој се однесува на јавните средства. Тенденцијата е овие рестрикции да бидат сведени на најниско можно ниво, а на секои пет години секој основ за ограничување на објавувањето на податоците се преиспитува.

Заменичката на претседателот на Владата Грковска нагласи дека Владата ги задолжи сите институции на своите веб-страници да објавуваат податоци за јавните набавки, со цел граѓаните, невладиниот сектор и медиумите да имаат полесен преглед на тоа како се трошат јавните средства.

На состанокот стана збор и за концептот на естонскиот Закон за јавни информации, како и за надлежнoстите на Агенцијата за заштита на податоците.

12.05.2022 - 10:35

 

 

 

 

 

 

 

Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа

најчитано сега