Парламентот на Гренланд изгласа промена на временската зона, со која поголемиот дел од овој арктички остров на крајот од 2027 година официјално ќе се врати на својата претходна временска зона ГМТ-3.
Според одлуката, од 31 октомври 2027 година, временската разлика помеѓу Гренланд и Копенхаген ќе се зголеми за еден час и ќе изнесува четири часа, додека разликата со Вашингтон ќе се намали за еден час и ќе изнесува два часа. Гренланд и понатаму ќе продолжи да го применува летното сметање на времето.
Инаку, поголемиот дел од Гренланд се префрли на времето ГМТ-2 дури во 2023 година, со цел да го усогласи своето работно време со Данска и остатокот од Европа.
Премиерот предупреди на економски последици, граѓаните бараа враќање на старото
Премиерот на Гренланд, Јенс-Фредерик Нилсен, се спротивстави на одлуката во парламентот, предупредувајќи на можни негативни економски последици со оглед на тоа што најважните трговски партнери на островот се во Европа.
„Промената ќе го скрати времето во кое здравствениот систем на Гренланд може да се консултира со специјалисти во Данска, а постојат и сериозни ризици од тешкотии во воздушниот сообраќај со Европа“, истакна премиерот Нилсен.
И покрај овие предупредувања, иницијативата на граѓаните пресуди. Голем дел од жителите сакаа враќање на претходната временска зона, при што беа собрани околу 4.000 потписи за поддршка, што е значајна бројка за остров кој има население од околу 56.000 жители.