Од почетокот на годинава до денеска во Грција се изречени 741 административна казна за предизвикување пожари, во вкупна вредност од 1.211.770 евра, а уапсени се 314 лица.
Според податоците на грчката противпожарна служба, најголемиот дел од случаите се поврзани со невнимание. Дури 88,85 проценти од пожарите за кои биле преземени мерки биле предизвикани ненамерно, а за нив биле уапсени 279 лица.
За намерно предизвикување пожари биле уапсени 35 лица, што претставува 11,15 проценти од вкупниот број приведени.
Истрагите ги води специјализираната Дирекција за справување со кривични дела поврзани со подметнување пожари во рамки на противпожарната служба.
Од службата нагласуваат дека секое намерно подметнување пожар со кое се загрозуваат човечки животи, имот или природната средина се истражува детално, а сторителите по идентификацијата веднаш се изведуваат пред надлежните органи.
Последниот случај е регистриран доцна синоќа во западниот дел на Атика, поширокиот регион на Атина. Државјанин на Пакистан е уапсен откако, според надлежните, со запалка предизвикал пожар во сува трева на три одделни жаришта покрај булевар.