Шест пожари се активни утрово на територијата на државата, пет се ставени под контрола, додека 19 биле целосно изгаснати во изминатото деноноќие, информираат од Центарот за управување со кризи.
Според податоците на ЦУК, активено е жариштето меѓу селата Грачани и Никиштани, кое се протега и на територијата на Косово каде гори шума. Во Македонски Брод сè уште гори во атарот на селото Белица, во месноста Кајорец кон селото Брезница кај репетиторот, каде зафатена е нискостеблеста и мешана шума.
Огнот е активен и во Чучер-Сандево кај селото Брест на месноста Рамно, како и во Ново Село, поточно кај селото Стиниќ каде што гори мешана шума и ниска вегетација.
Во кичевскиот регион активни се пожарите во околината на селата Кнежино и Добреноец, како и во месноста Дарда во близина на селото Тајмиште.
Под контрола на противпожарните тимови во моментот се локациите во општина Струга (на потегот Буринец – Локов – Селци), во општина Македонски Брод кај селото Брезница, во општина Сарај кај селото Копаница, како и депониите во Кратово и Делчево.
Во изминатите 24 часа целосно се ликвидирани 19 пожари на отворен простор, меѓу кои во Неготино, Гази Баба, Брвеница, Гостивар, Куманово, Липково, Битола, Прилеп, Кичево, Струга, Маврово и Ростуше, Сопиште, Струмица, Гевгелија и Градско.