Вкупно осум пожари на отворен простор се регистрирани до 13:00 часот, од кои два се активни, еден е под контрола, а пет се целосно изгаснати, соопшти Центарот за управување со кризи (ЦУК).
Активни жаришта во моментов има на територијата на општина Македонски Брод и општина Гостивар.
Во Македонски Брод се интервенира кај селото Грешница, на местото викано Стојанова Населба, каде што горат ниска вегетација, деградирана шума и грмушки.
Вториот активен пожар е во Гостивар, во близина на селото Падалиште, каде што е зафатена ниска вегетација и нискостеблеста шума.
Пожарот во Општина Делчево, кој избувна кај градската депонија, е целосно ставен под контрола од страна на пожарникарите.
Според информациите од ЦУК, успешно се изгаснати пет пожари на неколку локации низ земјава.
Пожарникарите ги ликвидираа пожарите во Општина Струга кај селото Долна Белица каде гореше дива депонија, во Општина Босилово кај селото Моноспитово каде гореше ниска вегетација, како и во Општина Валандово кај селото Севенендекли каде беше зафатена мешана шума.
Изгаснати се и пожарите во Општина Гевгелија помеѓу селата Селемли и Стојаково каде исто така гореше дива депонија, како и во Општина Гази Баба покрај железничката пруга во населбата Маџари, каде гореше ниска вегетација.