Полицијата во американската сојузна држава Масачусетс уапси една жена и 55 мажи во голема акција против производство и делење материјали за сексуална злоупотреба на деца, како и нивно подведување.
Осомничените се на возраст од 18 до 75 години, а меѓу нив има успешни бизнисмени, сопружници и родители, соопшти полицијата.
Според истрагата, 25 лица се обвинети за поседување детска порнографија, а 19 за подведување на деца. Некои од нив склучиле договори со полициски информатори и дошле на локација со намера да имаат сексуални односи со малолетно лице за пари.
„Уапсивме успешни бизнисмени, сопружници и родители. Некои дојдоа со намера да се сретнат со малолетно дете за пари. Оваа експлоатација на невини деца мора да престане!“, изјави полковник Даниел Такер, предводник на акцијата.
Полицијата најави дека акцијата е дел од поширока национална операција против онлајн сексуална експлоатација на деца и дека се очекуваат нови апсења во наредниот период.