Научниците од организацијата OCEARCH регистрираа присуство на голема бела ајкула во близина на популарните плажи на американската држава Њу Џерси. Станува збор за младата женка по име Нори, долга 2,7 метри и тешка околу 192 килограми, која е дел од глобалната програма за мониторинг.
Експертите откриваат дека ова е една од првите големи бели ајкули регистрирани за време на сезоната на миграција оваа година. Иако нејзините движења се природни, појавата на предаторот предизвика внимание кај пливачите и сурферите во овој регион.
Нори последен пат била лоцирана во близина на Нова Шкотска минатиот октомври, по што ги поминала зимските месеци во потоплите јужни води. Сигналот од нејзиниот предавател првпат бил забележан на 4 мај, а неколку дена подоцна е потврдено дека таа сè уште се наоѓа во истата област.
„Експертите истакнуваат дека големите бели ајкули генерално ги поминуваат зимските месеци во потоплите јужни води, пред да се упатат кон север во пролет и лето“, се наведува во соопштението на OCEARCH.
Поради зголемената активност на ајкулите, властите ги советуваат граѓаните да избегнуваат капење во матни води, особено во зори и самрак, како и во близина на места каде што има фоки или поголема концентрација на риби.