По повод Меѓународниот ден на семејството, Орце Ѓорѓиевски денеска го посети СОС Детско село, каде оствари средби со децата и младите кои таму го наоѓаат својот дом. Нагласувајќи дека ова била една од неговите најемотивни посети досега, тој најави конкретни чекори за поддршка на овие херои.
Најважната вест е дека со следниот ребаланс на буџетот, Град Скопје ќе обезбеди директни субвенции за секое згрижувачко семејство. Целта е на овие дечиња да им се олесни патот кон стабилен и достоинствен живот.
„Овие дечиња за мене се вистински херои. Нашата поддршка нема да остане само на зборови, туку ќе биде со дела. Оваа иницијатива ќе ја покренам и преку ЗЕЛС до сите општини во Македонија, бидејќи секое дете заслужува еднаква шанса“, истакна Ѓорѓиевски.
Тој додаде дека Град Скопје ќе потпише меморандум со бизнис-заедницата за да се обезбедат загарантирани работни места за овие млади луѓе, овозможувајќи им сигурна иднина во сопствениот град и држава.