Скопје следната година ќе биде домаќин на Светското првенство во танц, најави градоначалникот Орце Ѓорѓиевски за време на своето обраќање на Европското првенство во танц што се одржува во главниот град. На европскиот собир учествуваат повеќе од 2.900 танчери од 26 европски земји.
Ѓорѓиевски им посака топло добредојде на сите учесници, истакнувајќи дека градот овие денови живее во ритамот на младоста, енергијата и талентот.
„Скопје денес е голема европска сцена на која се среќаваат култури, се создаваат нови пријателства и се споделува една заедничка страст, љубовта кон танцот. Танцот е јазик кој не познава граници. Во него се спојуваат талентот, дисциплината, емоцијата и посветеноста“, истакна Ѓорѓиевски.
Тој им посака успешни настапи на натпреварувачите, со желба од Скопје да понесат прекрасни спомени.
Во однос на претстојниот глобален настан, градоначалникот нагласи дека тоа претставува големо признание и потврда за капацитетите на градот.
„Со особена гордост најавив дека следната година Скопје ќе биде домаќин и на Светското првенство во танц, големо признание за нашиот град и потврда дека Скопје има капацитет, енергија и амбиција да биде домаќин на најголемите меѓународни настани. Добредојдовте во Скопје, во градот кој овие денови танцува заедно со Европа, а следната година ќе танцува со светот!“ порача Ѓорѓиевски.