Германските служби за вработување упатија сериозно предупредување до владата да не ја преполовува квотата за работници од земјите од Западен Балкан кои не се членки на Европската Унија. Според надлежните, ваквиот потег може дополнително да го влоши акутниот недостиг на квалификувана работна сила во земјата.
Сојузната агенција за вработување со седиште во Нирнберг објави податок дека во моментов над половина милион луѓе од Западен Балкан работат во Германија на работни места кои подлежат на социјално осигурување.
Ванеса Ахуџа, член на управниот одбор на Агенцијата, порача дека постоечката годишна квота од 50.000 лица од регионот кои можат да дојдат на работа во Германија – позната како „Регулатива за Западен Балкан“ – во никој случај не смее да се намалува.
Податоците покажуваат дека 53 отсто од работниците кои се преселиле од овој регион во Германија работат како квалификувани кадри или поседуваат повисоки квалификации, а околу половина од нив се ангажирани во сектори со критичен недостиг на кадар.
– Преполовувањето на квотата ќе го ослаби успешниот модел на имиграција, ќе го влоши недостигот на квалификувана работна сила и ќе им ја отежне на компаниите потрагата по нови работници, изјави Ахуџа.
Таа нагласи дека за успешно реализирање на владините инвестициски програми и плановите за забрзана изградба, компаниите мора да имаат слободен пристап до соодветен кадар.
И покрај овие предупредувања, германската Влада планира од јануари 2027 година да ја преполови квотата, со што бројот на лица од Западен Балкан кои годишно би можеле да се вработат во земјата би се свел на 25.000.