Сопственикот на „Дурмо турс“, Дурмиш Белули, повторно поднел барање за одложување на извршувањето на затворската казна, повикувајќи се на здравствени причини поврзани со неодамнешна хируршка интервенција. Според медицинската документација доставена до надлежните институции, по извршената операција му било препорачано мирување во период од 20 до 30 дена.
Белули требаше да се јави на издржување на правосилно изречената затворска казна во казнено-поправната установа „Идризово“, но наместо тоа, повторно побарал пролонгирање, со образложение дека моменталната здравствена состојба не му дозволува веднаш да започне со издржување на казната. Судот треба да оцени дали доставените медицински наоди претставуваат оправдана причина за ново одложување.
Ова не е првпат Белули да бара пролонгирање на извршувањето на казната, што предизвикува реакции и зголемен интерес во јавноста. Станува збор за лице кое е правосилно осудено за сообраќајната несреќа кај Ласкарци, во која загинаа 16 лица, а случајот со години се смета за еден од најтешките и најчувствителни судски предмети во земјава.
Надлежните институции, во рамки на законските процедури, треба да утврдат дали здравствената состојба навистина претставува пречка за издржување на казната или дали осуденикот може да биде згрижен и лекуван во рамки на затворскиот систем. Одлуката на судот се очекува во наредниот период.