Сопственикот на „Авалон“, Бобан Милошески, јавно ѝ се извини на новинарката Мирослава Симоновска и на медиумот „Слободен печат“ за начинот на кој ѝ се обратил на претходната прес-конференција.
„Сакам да ја искористам оваа прилика да упатам јавно извинување за претходниот прес, за неџентлменски искажаната прва реченица без персирање и за афектно искажаната реченица, исто така без многу памет“, рече Милошески.
Тој објасни дека реакцијата била последица на умор и стрес и дека одговорил без доволно да размисли.
„Тоа е онаа ситуација кога едноставно јазикот ти е побрз од мозокот. Мене конкретно тоа ми се случи на таа прес-конференција“, изјави Милошески.
Тој додаде дека не го очекувал прашањето и дека одговорил во афект.
„Најискрено се извинувам и на Мирослава и на ‘Слободен печат’ како медиум“, рече Милошески, додавајќи дека со редакцијата имаат долгогодишна и добра соработка.
На крајот од обраќањето тој повторно го упати извинувањето и директно ја праша Симоновска дали го прифаќа.