Претседателот на Собранието Африм Гаши ќе ја врати на доработка иницијативата на СДСМ и Левица за формирање анкетна комисија што треба да ги испита околностите за трагедијата во Кочани. Како што информираше Гаши на брифинг, во поднесениот предлог било утврдено дека мнозинството во комисијата му припаѓа на опозицискиот блок, што е спротивно на собранискиот Деловник.
Според член 3 од иницијативата, предложениот состав на комисијата е:
– 4 членови од СДСМ,
– 4 од ДУИ,
– 1 од Левица,
– 3 од ВМРО-ДПМНЕ,
– 2 од Вреди и
– 1 од ЗНАМ.
Гаши се повика на член 124 од Деловникот, според кој сите работни тела, вклучително и анкетните комисии, мора да имаат состав пропорционален на парламентарниот распоред на сили. Тоа значи дека мнозинството во комисијата го има власта, додека претседателот се избира од редовите на опозицијата. Бидејќи ова правило не е испочитувано, иницијативата е вратена на доработка.
Инаку, предлогот за анкетна комисија беше поднесен минатата недела од 20 пратеници на СДСМ и Левица. Власта соопшти дека ја прифаќа идејата за формирање вакво тело, но најави дека ќе бара проширување на надлежностите и со други трагедии – пожарот во модуларната болница во Тетово и автобуските несреќи на „Беса транс“ и „Дурмо турс“.