Силна експлозија одекнала ноќеска околу 3 часот во белградската населба Звездара, откако засега непознато лице фрлило експлозивна направа пред станбена зграда.
Според првичните информации од теренот, најверојатно станува збор за рачна бомба М-75.
Полицијата на местото на инцидентот разговарала со А.О. (24), жител на зградата, кој и претходно бил евидентиран во полициските досиеја и бил осудуван.
Тој во изјава за полицијата рекол дека се сомнева оти бомбата била наменета токму за него и дека била фрлена директно кон неговата тераса. Како што објаснил, направата се одбила од терасата и паднала на тротоарот меѓу паркираните автомобили, каде што експлодирала.
Младиот човек навел и дека пред само еден месец му бил запален автомобилот, поради што верува дека повторно се нашол на мета на истите напаѓачи.
Од силната детонација е причинета голема материјална штета на околните објекти и на три паркирани автомобили. Оштетени се и блиските локали на кои им се искршени излозите, а видливи штети има и на фасадата, како и на влезната врата од соседната зграда.
Во силната експлозија нема повредени лица.
Полицијата и надлежното обвинителство интензивно работат на расветлување на случајот и на идентификација и пронаоѓање на напаѓачот.