Јон Фрчкоски, член на Извршниот одбор на СДСМ, денеска упати обвинувања до премиерот Христијан Мицкоски за, како што рече, окупација на Развојната банка заради бизнис интереси. Според партијата, назначувањето на Ефимија Димовска за прв човек на банката е директно поврзано со деловните релации на Мицкоски во енергетскиот сектор.
Фрчкоски истакна дека сопругот на Димовска, Димитар Димовски, е долгогодишен партнер на Мицкоски во хидроцентралите преку компанијата „Енерготек“.
,,Ефимија Димовска, сопруга на бизнис-партнертот на Мицкоски во хидроцентралите, е назначена за прв човек на Развојната банка. Нејзиниот сопруг, Димитар Димовски е долгогодишен бизнис-партнер на Христијан Мицкоски во хидроцентралите, преку компанијата „Енерготек“ ДОО Скопје. Сега Димовска ја избра да одлучува за кредитни линии и финансирање на енергетски проекти’’, изјави Фрчкоски.
Од СДСМ тврдат дека станува збор за класичен конфликт на интереси, бидејќи семејството Димовски поседува приватни енергетски фирми. Опозициската партија побара итно повлекување на Димовска и реакција од Антикорупциската комисија.