Во тек се последните подготовки пред почетокот на изградбата на новиот булевар „Македонско-косовска бригада“, каде што денеска увид во активностите извршија градоначалникот Орце Ѓорѓиевски и градоначалникот на Општина Чаир, Изет Меџити.
Како што извести Ѓорѓиевски, изградбата во првата фаза ќе се одвива на потегот од крстосницата со улицата „Џон Кенеди“ до булеварот „Босна и Херцеговина“.
Новото сообраќајно решение предвидува четири ленти, по две во секоја насока, средишно зеленило, велосипедски патеки во двата правци и уредени тротоари. Проектот опфаќа и изградба на нова атмосферска канализација, современо улично осветлување, заштитно зеленило од двете страни и проширувања за автобуските стојалишта.
Во својата изјава, Ѓорѓиевски го истакна значењето на инвестицијата за главниот град:
„Скопјани заслужуваат модерна, безбедна и функционална инфраструктура. Тоа е еден од темелите на мојата визија за град што се развива плански, рамномерно и со јасна стратегија.“
Тој додаде дека со оваа инвестиција се зголемува сообраќајната безбедност и се подобрува мобилноста на граѓаните.
„Со изградбата на овој булевар создаваме нов, модерен и организиран урбан простор. Ја зголемуваме безбедноста, ја подобруваме мобилноста и градиме инфраструктура што ќе им служи на многу генерации. Скопје го развиваме рамномерно, во секоја општина и за секој граѓанин!“, порача Ѓорѓиевски.