Претседателот на СДСМ, Венко Филипче, на денешната прес-конференција упати остри критики кон Владата за начинот на кој се справува со економската криза и ценовните шокови. Тој побара итно прифаќање на пакетот мерки предложени од опозицијата, потенцирајќи дека власта нема право на комоција и доцнење.
Во своето обраќање, Филипче директно го повика премиерот на одговорност:
„Апелирам на две работи. Апелирам Владата да се свести, премиерот да почне да живее во реалноста тука кај нас, да престане вака дилетантски да ја води Владата, барем малку да се замисли, да помисли како живеат граѓаните и да ги прифати нашите предлог мерки, пакет на мерки сега, иако е касно, колку-толку ќе имаат некаков ефект.“
Според лидерот на СДСМ, доколку овие мерки биле прифатени пред неколку недели, немало да дојде до спиралата на поскапувања и ценовни шокови кај храната и другите продукти кои настанаа како резултат на растот на горивата.
„Освен ДДВ за храна, за горива, акцизите за горива и преполовување на цените на патарините… Владата сериозно да ги разгледа опциите за зголемување на државните резерви на нафта“, порача тој.
Осврнувајќи се на најавите дека Владата допрва ќе разгледува мерки на седница, Филипче истакна:
„Нема храброст премиерот да признае дека мерките се добри и требаше уште тогаш кога ги предлагавме да се имплементираат, поради тоа што тогаш тие мерки ќе дадеа вистински ефект. Ова е доказ дека граѓаните се оставени сами да се справуваат, дека ниту премиерот, ниту било кој во Владата има желба, а јас сум сигурен дека немаат ни капацитет, за да им помогнат на граѓаните.“
За крај, тој предупреди дека минималното покачување на платите нема да помогне, особено поради прогнозите за времетраењето на кризата.
„Повторувам, кризата ќе трае. Допрва доаѓаат лошите ефекти од кризата. Експертите предупредуваат и утре да заврши војната, кризата нема да заврши“, заклучи Филипче, порачувајќи ѝ на Владата да престане да се фали со странски граѓани кои точат гориво, туку да почне да работи за својот народ.