„Што кажуваат фактите и каква е реалноста во Виница?“, праша вечерва Претседателот на СДСМ, д-р Венко Филипче на граѓанската трибина „Се бориме за нашиот дом“ откога кажа дека тој нема што да каже, ниту еден проект кој го подобрил животот на граѓаните во Виница.
„Ќе беше добро да имам што да кажам дека направил градоначалникот на ВМРО-ДПМНЕ изминатите 4 години, барем нешто со што ви го подобрил и олеснил животот, за да не помисли повторно Мицкоски дека го мразам. Но, во Виница денес ништо нема од тоа што се ветувало. Нема спа-центар во село Истибања, нема туристичка викенд-населба на Плачковица, нема локален пат Трсино – Голак, нема нова индустриска зона во Поповец, нема нов булевар, нов локален пат, индустриска зона – апсолутно ништо, никаков проект“, рече претседателот Филипче.
Наместо развој, рече Претседателот на СДСМ, Венко Филипче, денеска Виница има јавни претпријатија кои тонат во долгови и град полн со смет, повисоки комунални давачки и повисоки стапки за данок на имот.