Претседателот на СДСМ, Венко Филипче, денеска се обрати до младите со порака за политичка мобилизација и борба за иднината на државата. Тој во својот говор се осврна на актуелните општествени предизвици и причините поради кои младите луѓе се соочуваат со дилеми дали да заминат од земјава.
Филипче потенцираше дека СДСМ дејствува како државотворна партија која во минатото носела клучни одлуки за просперитетот на татковината.
Според него, во моментов се создава пошироко граѓанско здружување кое ги надминува чисто партиските рамки и обединува различни општествени чинители.
Тој ја критикуваше актуелната власт и упати директен повик до младата популација за активно вклучување во процесите за градење на нов систем.
„Вие сте оние кои секој ден размислувате дали да останете во својата земја или да заминете. Вие сте оние кои не сакате да градите иднина врз лаги и врз систем во кој правдата важи само за некои. Затоа сме тука. Затоа се бориме. Не сме тука за да чекаме подобри времиња. Туку за да ги создадеме. Не сме тука за да се помириме со тоа дека организирана криминална група управува со државата. Туку за да ја вратиме државата во рацете на граѓаните.“
Лидерот на социјалдемократите образложи дека новата платформа има за цел да обезбеди слободна и демократска држава интегрирана во Европската Унија.
„Денес носител на промените не е само СДСМ, туку еден широк граѓански фронт. Затоа што мораме сите заедно. Не само како партија, туку како граѓани кои сакаат успешна Македонија. Затоа денес поединци, експерти, граѓански иницијативи и невладини организации, сите заедно стоиме под еден покрив – Фронтот за вистина и правда. Фронтот не е само political проект. Тоа е борба на сите кои сакаат Македонија да биде слободна, праведна и дел од Европа. Борба во која секој млад човек кој сака да остане и да живее достоинствено има свое место.“
На крајот, Филипче ја нагласи важноста на младинската енергија во овие процеси, отфрлајќи го воспоставувањето на култ кон лидерите во политиката.
„Вие не сте само иднината. Вие сте сегашноста. Вие имате најмногу сила и енергија за оваа борба. И токму затоа оваа борба е ваша. Останете. Борете се. Верувајте. Македонија може подобро. И ќе биде подобра. Нам не ни треба култ на лидер. Нам ни треба систем. Нам ни треба слободна, демократска и правна држава а затоа ни треба европска Македонија. Сите заедно! А, јас сум со вас сум. До победа!“