Претседателот на СДСМ, д-р Венко Филипче, на денешна прес-конференција во Собранието предупреди дека Владата планира ново задолжување од 1,3 милијарди евра, со што вкупниот јавен долг на државата ќе достигне ниво од речиси 12 милијарди евра, односно околу 65% од Бруто домашниот производ (БДП).
Филипче посочи дека ова задолжување не е предвидено во ребалансот на Буџетот и ја обвини власта за отсуство на стратегија за подобрување на економијата.
„Колку треба да биде очаен човек да каже дека расте бруто домашниот производ, а при тоа, секојдневно, брутално и сè повеќе ја задолжува земјата? Затоа што, ако економијата добро работи, тогаш ќе се задолжуваме со помалку пари и вкупниот долг ќе се намалува, а нема да се зголемува“, рече Филипче.
Според него, со оваа последна одлука, Владата предводена од Христијан Мицкоски за малку повеќе од две години создава нов долг од речиси четири милијарди евра. Тој ги отвори и прашањата околу ефектот и легалноста на унгарскиот кредит од една милијарда евра.
„Заемот кој што е сега предмет на истрага, заемот поради којшто сега цела Европа и цел свет знае дека владата, на чело со Христијан Мицкоски, е под истрага и се сомневаат во нелегални процеси“, рече Филипче.
Лидерот на СДСМ најави дека партијата повторно ќе поднесе предлог-закон за зголемување на минималната плата на 36.000 денари (600 евра), со паралелно субвенционирање на придонесите за приватните компании со цел да се заштити бизнис-секторот.