Земјите членки на Европската унија имаат рок од пет години да се подготват за можен воен конфликт, стои во нацрт-документот на Европската комисија до кој дојде порталот Politico.
„До 2030 година, Европа мора да има доволно силен одбранбен систем за веродостојно да ги одврати своите противници и да може да одговори на секоја агресија“, се наведува во документот.
Планот, кој бил разгледуван од министрите за одбрана, ќе биде официјално претставен пред Европската комисија, а следната недела ќе биде доставен и до лидерите на земјите членки.
Според Politico, документот наречен План за одбранбена подготвеност 2030 е јасен знак за растечката улога на ЕУ во воените прашања — реакција на војната на Владимир Путин против Украина и на несигурната посветеност на американскиот претседател Доналд Трамп кон европската безбедност.
„Милитаризираната Русија претставува постојана закана за европската безбедност во догледна иднина“, се наведува во текстот што прв го објави Bloomberg.
Иако земјите на Унијата ги зголемуваат своите воени буџети, голем дел од трошоците и натаму се распарчени на национално ниво, што доведува до зголемени трошоци и недоволна усогласеност на системите.
Европската комисија ги повикува земјите членки да купуваат оружје заедно и предлага до крајот на 2027 година најмалку 40% од набавките на одбранбена опрема да бидат преку заеднички договори.
Планот дополнително поставува цел најмалку 55% од купената опрема до 2028 година да биде од компании со седиште во ЕУ и Украина, а до 2030 година тој удел да достигне 60%.