Ситуацијата на Блискиот Исток ескалираше во директен воен конфликт меѓу Соединетите Американски Држави и Иран. Според извештаите на американската телевизија „Фокс Њуз“, која се повикува на високи воени извори, американската војска извршила воздушни удари врз клучните ирански пристаништа Бандар Абас и Кешм.
Конфликтот започнал со американски напад врз ирански танкер во стратешки важната Ормуска Теснина. Како одговор на ова, иранската државна телевизија ИРИБ објави дека нивните сили истрелале ракети врз „непријателските единици“, нанесувајќи им штета и принудувајќи ги да го напуштат подрачјето.
Во текот на изминатите неколку часа, експлозии одекнаа и над главниот град Техеран. Иранските медиуми потврдија дека системите за противвоздушна одбрана биле активирани во западниот дел на градот против, како што велат, „непријателски цели“.
„Нашите ПВО системи дејствуваа против неколку беспилотни летала над островот Кешм и градот Бандар Абас. Срушени се две непријателски летала, а експлозиите кои ги вознемирија граѓаните се последица на успешното дејствување на одбраната“, пренесува новинската агенција „Мехр“.
Додека Вашингтон потврдува удари врз пристаништата, иранските медиуми во првичните извештаи се обидоа да ги минимизираат штетите, наведувајќи дека детонациите во близина на Ормуз биле само резултат на соборување помали дронови. Сепак, сведоштвата на жителите од Бандар Абас зборуваат за силни експлозии кои го стресоа крајбрежјето, означувајќи ја најсериозната воена ескалација меѓу двете сили во поновата историја.