Демократската унија за интеграција (ДУИ) побара институционална одговорност за градоначалникот на Тетово, Биљал Касами, порачувајќи дека при одбележувањето на 35-годишнината од независноста во градот било поставено знамето од Вергина, додека албанското национално знаме било изоставено.
Од опозициската партија оценуваат дека овој чин не претставува протоколарен пропуст, туку одраз на односот на власта кон националните симболи на Албанците.
„Демократската унија за интеграција бара институционална одговорност за Биљал Касами, кој при одбележувањето на 35-годишнината од независноста на Република Северна Македонија во Тетово избра да го постави знамето на Вергина, додека албанското национално знаме беше изоставено. Ова не е прашање на протокол, туку јасен показател за односот на власта кон албанскиот национален симбол“, стои во партиското соопштение.
Од ДУИ потсетуваат на изборните ветувања на коалицијата ВЛЕН за рамноправна употреба на знамето, химната и грбот, обвинувајќи дека по влезот во Владата тие ветувања биле заборавени кроз неколку последователни примери.
„ВЛЕН во својата изборна програма вети дека албанското знаме, химна и национален грб ќе се користат рамноправно со македонските симболи. Но, штом станаа дел од Владата без легитимитет од албанските гласови, ветувањата беа заборавени. Најпрво, Максим Димитриевски ја забрани употребата на албанското национално знаме во нивната канцеларија; потоа видовме министри кои го избегнуваа на официјалните слики, додека за време на локалната изборна кампања албанското знаме недостасуваше токму таму каде што требаше да биде највидливо. Сега, на државен празник, кога неговата употреба е предвидена со закон, албанското знаме повторно е изоставено“, наведуваат од партијата.
Опозициската партија дополнително реагира на тоа што наместо официјални симболи, во центарот на Тетово бил истакнат симбол кој е во спротивност со меѓународните договори.
„Врвот на ова лицемерие е што, додека албанското национално знаме се изоставува, во центарот на Тетово се поставува знамето на Вергина, симбол кој не е официјален државен симбол и е во спротивност со Преспанскиот договор. Значи, за оние кои ветуваа рамноправност на националните симболи, албанското знаме нема место, додека еден неинституционализиран симбол има место на државна церемонија. Ова зборува повеќе од која било изјава за нивната денешна политика“, се додава во соопштението.
Од ДУИ апелираат надлежните органи да извршат проверки околу законската основа за овој настан и да ги утврдат одговорните лица.
„ДУИ бара надлежните органи да ја проверат законската основа на овој чин и одговорноста на лицата кои наредиле, одобриле или го реализирале поставувањето на знамето на Вергина, како и да објаснат зошто е изоставено албанското знаме. Законите не можат да се применуваат селективно, а ветувањата за рамноправност не можат да се користат само за добивање на гласовите на Албанците“, истакнуваат од ДУИ.
На крајот од соопштението се нагласува дека државните празници мора да се одбележуваат со почитување на сите заедници и закони во земјата.
„Касами може да прави политички компромиси за да ја задржи функцијата уште еден ден, но не може да го продава достоинството и националниот симбол на Албанците. 35-годишнината од независноста треба да биде ден на почитување на државата, законот и рамноправноста, а не ден на понижување и негирање на албанскиот симбол“, заклучуваат од ДУИ.