Државата итно го презема решавањето на долгогодишниот и опасен проблем со огромното свлечиште на патниот правец кон Теферич во општина Кисела Вода. Како што денеска соопшти вицепремиерот и министер за транспорт, Александар Николоски, веќе во текот на претстојната недела ќе биде официјално објавен јавниот повик за избор на градежна фирма која ќе изврши стабилизација и санација на овој критичен терен.
Одлуката на централната власт да го менаџира овој инфраструктурен предизвик доаѓа по јасната проценка дека локалните капацитети не се доволни за вака комплексен зафат. Како што уверуваат од ресорното министерство, веќе е изработен деталниот проект за стабилизација, со план сите градежни работи на терен да бидат целосно завршени уште пред почетокот на претстојната зимска сезона.
Според информациите од теренот, одлуката за одземање на ингеренциите за овој проект е донесена на последната владина седница, откако се утврдило дека Општина Кисела Вода и Град Скопје немаат доволно средства ниту механизација за трајно надминување на овој сериозен ризик по безбедноста на граѓаните.
„Toa e еден голем, исклучително сериозен проблем, имајќи предвид дека се работи за сериозно свлечиште. Гледате дека со автопатите, особено Охрид – Кичево, стекнавме едно такво искуство. Проблематиката е далеку поголема од возможностите и капацитетите што ги имаат Општина Кисела Вода и Град Скопје. Затоа премиерот Мицкоски реализира една координација на работна средба помеѓу нас, Општината и Градот. И овој вторник, на седница на Владата, донесовме одлука, со која целокупниот проект го презеде Министерството за транспорт. Веќе имаме изработено проект за стабилизација и санација и очекувам најбргу што може, а тоа е непосредно следната недела, да излезе тендерот за избор на изведувач. Потоа, некаде за месец-месец и пол, кога ќе се избере изведувач, да можеме да работиме на санација и пред почетокот на зимата таа санација да биде завршена, така што целокупната проблематика ја презеде Владата преку Министерството за транспорт“ – изјави Николоски одговарајќи на новинарско прашање при посетата на општна Кисела Вода.