Центарот за управување со кризи (ЦУК) излезе со детален извештај за штетите предизвикани од обилните врнежи што ја зафатија државата во изминатите 24 часа. Заклучно со синоќа во 21:00 часот, состојбата е најкритична во западниот и југозападниот регион, каде се регистрирани излевања на реки, поплавени домови, земјоделско земјиште и сериозни проблеми во сообраќајот.
Кичево најпогодено: Евакуирани 60 жители Најдраматично било во Кичево, каде надлежните служби морале итно да интервенираат. Евакуирани се вкупно 60 лица од нивните домови на улицата „Прилепска“, откако водата навлегла во станбените објекти.
Гостивар и Тетово: Вардар се излеа, одрони на патиштата Во гостиварскиот регион, кај Балин Дол, реката Вардар се излеа од своето корито, поплавувајќи 10 земјоделски парцели и неколку дворови. Дополнителен проблем направило паднато дрво во коритото на Вардар кај село Форино, што создало ризик од поголема поплава, но екипите интервенирале. Поради надојдените води, намалено е и производството на ХЕЦ Маврово. Во Тетовско, излеаните реки Лакавичка и Сушичка направија штети врз земјоделското земјиште кај селата Мало Турчане и Горно Бањице. Од ЦУК напоменуваат дека Општината немала соодветна механизација за справување со ситуацијата. Сообраќајот е отежнат поради одрони на патните правци Гостивар – Стража и Тетово – Бањиче (кај месноста Цртан ѕид).
Југозапад и Пелагонија: Поплавени фарми и подруми Во Битолско, критично е кај селото Лера каде има поплава кај мостот со опасност да се прошири кон селото, а во село Породин настрадала живинарска фарма. Во Охрид и Ресен, водата навлегла во подруми, гаражи и дворови (селата Перово, Дремени, Долна Бела Црква), а интервенирале јавните претпријатија. Одрони се чистеле и на патот Охрид – Пештани и Струга – Дебар.
Следи снег и заладување Од ЦУК и УХМР предупредуваат дека опасноста не е помината. Под влијание на циклонска активност и продор на студен воздух, дождот денеска ќе премине во снег на планините и некои пониски места. „Во деновите од викендот, особено во сабота, повторно ќе има локални врнежи од дожд и снег кои наместа ќе бидат пообилни“, најавуваат метеоролозите. Граѓаните се повикуваат сите итни случаи да ги пријавуваат на бројот 112.