Во гимназијата „Велфен“ во баварскиот град Шонгау денеска се случи напад во кој тешко се повредени две ученички. Полицијата уапси 16-годишен осомничен, а на терен се распоредени голем број интервентни единици, при што полицијата не ја исклучува можноста дека станува збор за напад насочен кон повеќе лица, објави „Билд“.
Инцидентот бил пријавен во текот на денот, по што веднаш била покрената масовна безбедносна акција на германските служби.
„Пријавата за нападот била примена околу 12:50 часот, по што сите расположливи полициски сили биле испратени кон училиштето, кое се наоѓа југозападно од Минхен. Инцидентот се случил за време на редовната настава.“
Според германските медиуми, девојчињата се здобиле со убодни рани, но и покрај сериозноста на повредите, нивните животи во моментов не се во животна опасност. Засега нема подетални информации околу мотивите за овој крвав настан.
Сторителот, 16-годишник, првично избегал од местото на настанот, но по брзата интервенција на полицијата, во која бил вклучен и хеликоптер, тој бил лоциран и лишен од слобода.
Надлежната полициска управа веднаш излезе со првични детали за текот на истрагата на терен.
„Според досегашните сознанија, претпоставуваме дека станува збор за еден сторител. Засега нема индиции дека во настанот учествувале повеќе лица“, соопшти полицијата на Јужна Горна Баварија преку социјалната мрежа Икс.