Илјадници луѓе во Берлин мораа да бидат евакуирани од своите домови откако во четвртокот во реката Шпре беше пронајдена неексплодирана бомба од Втората светска војна.
Полицијата постави безбедносен „прстен“ од 500 метри во густо населен дел од градот, соопшти берлинската полиција.
Како дел од евакуацијата, полициски екипи ги посетија куќите и становите за да ги предупредат жителите дека мора привремено да се преселат од безбедносни причини.
Полицијата соопшти дека бомбата ќе биде деактивирана денес, кога нуркачите ќе можат да извршат подетален преглед.
Бомбата е четири метри под вода и е покриена со кал и слуз, што ја комплицира операцијата, рекоа тие.
Се очекува жителите денес да можат да се вратат во своите домови. Дотогаш, сообраќајот со бродови на реката Шпре, која тече низ Берлин, е прекинат.