Авион на „Рајанер“ што летал од Солун до германскиот Меминген, морал да се врати на аеродромот во Солун во петокот по сериозен дефект на моторот. Во инцидентот е повреден 61-годишен патник од Србија, а грчките власти започнале истрага за причината за дефектот.
Според грчкиот весник „Катимерини“, екипажот на летот FR1879, управуван од Боинг 737-8AS, забележал проблем со моторот додека авионот бил над Македонија. Бидејќи дефектот не можел да се поправи за време на летот, пилотите одлучиле да се вратат на аеродромот „Македонија“ во Солун.
При спуштањето, дел од оштетениот мотор се одвоил и удрил во прозорецот на патничката кабина, при што остатоците повредиле еден патник, но властите нагласуваат дека немало оштетување на структурата на трупот на авионот или декомпресија на кабината. По приемот на повик за помош, на аеродромот беа активирани итни процедури и службите го чекаа авионот на пистата, каде што тој безбедно слета, а четворица патници биле превентивно однесени во болница.
Меѓу нив бил и 61-годишниот државјанин на Србија кој бил префрлен во Универзитетската болница АХЕПА во Солун, со дијагностицирани гребнатини и повреди предизвикани од триење. Сепак, подраматичен опис на инцидентот даде претседателот на Панхеленската федерација на вработени во државните болници (ПОЕДИН), кој тврди дека ситуацијата можела да заврши многу полошо.
„Речиси се случи трагедија. Прозорецот беше скршен, телото на патникот излезе, а неговата сопруга го држеше“, рече претседателот на ПОЕДИН, објавија локалните медиуми.
Овие тврдења сè уште не се официјално потврдени од воздухопловните власти, додека официјалните информации наведуваат само дека патникот претрпел полесни повреди откако делови од оштетениот мотор удриле во прозорецот. Во меѓувреме, компанијата „Рајанер“ потврди дека авионот се вратил на аеродромот во Солун кратко по полетувањето.
„Според компанијата, летот бил прекинат откако прозорецот на патникот се одвоил за време на летот.“
По инцидентот, „Рајанер“ испрати резервен авион со кој повеќето патници го продолжија патувањето до нивната дестинација во Германија, а надлежните грчки воздухопловни власти во моментов спроведуваат детална истрага за да утврдат што точно го предизвикало откажувањето на моторот.