Пожарот што беснееше над градот Штип е целосно изгаснат, потврди за МИА градоначалникот на општина Штип, Иван Јорданов.
Според пожарникарот водич во Територијалната противпожарна единица – Штип, Дарко Коцев, околу полноќ огнот бил ставен под контрола, по што екипите во текот на ноќта спроведувале континуирани контроли за да се спречи повторно разгорување на пламените јазици.
Тој појасни дека веднаш по пријавата за пожарот на терен излегле 23 пожарникари со пет противпожарни возила, во целосна мобилизација на единицата.
Во гаснењето учествувале и 12 доброволни пожарникари од Доброволното противпожарно друштво – Штип, кои, како што наведуваат, за околу 10 минути се организирале и со сопствени теренски возила се приклучиле на интервенцијата, помагајќи на тешко пристапниот терен.
Градоначалникот Јорданов им се заблагодари на пожарникарите, доброволците, месното население и вработените во штипските јавни претпријатија за ангажманот во локализирањето на огнената стихија.
Според информациите на МИА, пожарот бил предизвикан од удар на гром на еден од ридовите над викенд-населбите Плуждино и Новакова Чешма. Поради ветерот, огнот брзо се ширел по ридските предели и се приближувал кон неколку населби во Штип.
Изгореле сува трева и грмушки, без штета на имот и без повредени лица.