Дивиот приклучок поставен на гостиварскиот водоснабдителен систем, кој е предмет на истрагата за загадувањето на водата, не се наоѓал во заштитните санитарни зони, туку на околу 800 до 900 метри од последната точка опфатена со дозволата што ја има ЈКП „Комуналец“ – Гостивар, информираше директорката на Државниот инспекторат за животна средина, Ивана Гиновска.
Таа на прес-конференција во Владата посочи дека за овој приклучок не било доставено барање до Министерството за животна средина и просторно планирање.
„Овој див приклучок воопшто не е во рамки на дозволата, надвор е од нејзиниот опсег. Не е ниту во санитарните заштитни зони, ниту во самиот извор, туку се наоѓа на околу 800 до 900 метри од главниот цевковод кој ги снабдува Гостивар и околните села со вода за пиење“, изјави Гиновска.
Според неа, за секоја измена на дозволата која ја поседува комуналното претпријатие мора претходно да биде поднесено барање до Управата за животна средина – Сектор води, по што надлежните одлучуваат дали ќе ја одобрат промената.
„Во конкретниот случај станува збор за цевковод кој служи за вода за пиење и за кој важат исклучително строги санитарни услови. Такво барање до денес не е пристигнато во Министерството“, додаде директорката.
Гиновска информираше дека на 16 јули, по барање на Основното јавно обвинителство Гостивар, бил извршен вонреден инспекциски надзор, координиран со криминалистичката полиција, Агенцијата за храна и ветеринарство, Центарот за јавно здравје и ЈКП „Комуналец“.
Таа нагласи дека Државниот инспекторат за животна средина ќе продолжи да соработува со обвинителството, но дека нема надлежност за квалитетот на водата за пиење и лабораториските анализи.
Претходно, директорот на АХВ, Оливер Миланов, изјави дека истрагата треба да утврди како било дозволено пумпи да бидат поставени на див приклучок, додавајќи дека можно е тие да биле поставени непосредно пред настанот.