Кампањата „Гласот што го слушаме – македонско најдобро“, насочена кон директна комуникација со земјоделците и претставување на актуелните мерки и политики за поддршка на земјоделското производство, стартува денеска со првата трибина во Домот на културата во општина Босилово, со почеток во 18 часот.
Министерот за земјоделство, шумарство и водостопанство, Цветан Трипуновски, истакна дека директната комуникација со земјоделците е од голема важност.
„Ресорот земјоделство мора да одржува постојан и отворен дијалог со земјоделците. Тоа значи разговор за актуелните состојби и реалните предизвици со кои тие се соочуваат“, изјави министерот во телевизиско интервју.
Во рамки на кампањата се формирани два големи тима кои ќе посетат над 30 општини, како и шест помали тимови кои ќе опфатат повеќе од 120 населени места. Средбите ќе се одржуваат секој петок, среда и сабота, во зависност од типот на тимовите.
На прес-конференција, министерот најави дека во помалите тимови ќе учествуваат директорите на клучните институции: Даниела Иротова од Платежната агенција, Филип Филиповски од АД Водостопанство, Васе Анакиев од Државниот инспекторат за земјоделство, Оливер Миланов од Агенцијата за храна и ветеринарство и Здравко Трајанов од ЈП Национални шуми. Еден од тимовите ќе го предводи министерот, а во активностите ќе се вклучат и останатите директори и локалните структури на Министерството.
Целта на кампањата е да се слушнат предизвиците и идеите на земјоделците. На средбите ќе се разговара за тековните проблеми, предлозите за унапредување на производството, како и за спроведените мерки и политики во изминатите две години. Министерот нагласи дека земјоделците се не само производители, туку двигатели на руралниот развој, чувари на традицијата и клучен фактор за стабилност на домашниот пазар.
Министерот ги повика земјоделците активно да се вклучат во кампањата, истакнувајќи дека најдоброто од Македонија доаѓа од македонските ниви и од вредните раце на нашите чесни и работливи земјоделци.