На премиерот Мицкоски и на ВМРО им одговара да ја држат државата изолирана од Европската Унија за да можат да продолжат да го крадат народот, нагласи генералниот секретар на СДСМ, Александар Саша Димитријевиќ, во гостувањето во „Студио 10“ на ТВ 24. Димитријевиќ посочи дека целата хистерија и спинови што ги пласира ВМРО околу идентитетските прашања е само за да продолжат со криминалот и корупцијата. Тој изјави дека СДСМ со месеци предупредува дека власта свесно ја држи државата во изолација, бидејќи европската интеграција ќе значи воведување ред и крај на криминалот на ВМРО.
„На Мицкоски му одговара оваа ситуација, да ја држи Македонија изолирана и да ја држи Македонија надвор од европските институции. Тоа е така од еден едноставен факт, бидејќи доколку успееме да влеземе во тие пристапни преговори, доколку ја оствариме нашата стратешка цел, нема да можат да го прават тоа што го прават сега. Нема да може да местат тендери на блиски луѓе, нема да може да си ги делат парите меѓу себе, едноставно ќе се воведе некој ред во државата и едноставно ќе им секне тој извор на финансирање. Така што целиот спин и целата хистерија што ја прави ВМРО во јавноста ја прават единствено со една и единствена цел – да продолжат да го крадат македонскиот народ“, рече Димитријевиќ.
Во интервјуто, Димитријевиќ нагласи дека македонскиот идентитет не е загрозен од внесувањето на малцинствата во Уставот, туку од криминалот и корупцијата на Владата на ВМРО.
„Идентитетот на Македонија е загрозен само од криминалот и корупцијата и дилетантската политика на ВМРО. Прашањето на внесувањето на Бугарите во Уставот, и не само на Бугарите, туку и на други малцинства, е прашање помеѓу Македонија и Европската Унија. Внесувањето на малцинствата е основен услов за да продолжиме понатаму со преговорите и на тој начин не се загрозува македонскиот идентитет. Сè што на некој начин во изминатиот период СДСМ како добри политики го донесе, го срушија“, рече Димитријевиќ.
Тој додаде дека Владата на ВМРО нема никаков напредок ниту визија на меѓународен план, а реформските процеси се целосно блокирани.
„Мицкоски има двотретинско мнозинство и треба да почне да работи навистина на интеграција на Македонија во Европската Унија. Гледаме дека во целиот изминат период имаме една тотално погрешна политика и гледаме дека на меѓународен план ниту министерот за надворешни работи Муцунски, ниту премиерот, ниту претседателката имаат никаков напредок, немаат воопшто ниту визија како тоа да го направат. Од 10 реформски закони коишто треба да ги донесеме, осум не се донесени. Министерот Филков и целата таа владејачка структура и тој привезок ЗНАМ на ВМРО апсолутно немаат намера ништо да направат по тоа прашање“, изјави Димитријевиќ.
Притоа, Димитријевиќ потсети дека СДСМ покажа како се штити македонскиот идентитет, преку членството во НАТО и заштитата на македонскиот јазик.
„СДСМ во своето владеење покажа како се штити идентитетот и како се штити достоинството. Ја внесовме државата во НАТО, започнавме и отворивме сериозни преговори, се заштити јазикот со преговарачката рамка на чист македонски јазик. Така што, верувајте, Мицковски во оваа фаза ниту сака, ниту може да го придвижи тој процес“, рече Димитријевиќ.